Көпбейінді шаруашылық есеп бөлімшесінің меңгерушісі
Медицинада еңбек жолыңыз қалай басталды? Сіз үшін ең қиын қай кезең болды?
Бала кезімнен адам ағзасының қалай жұмыс істейтіні қызықтыратын. Медициналық факультетте оқып жүргенде дәрігерлік кәсіп тек білімді ғана емес, мұқият, жанашыр болуды және стреске төзімділікті қажет ететінін түсіндім.
Оқуды аяқтаған соң аудандық ауруханада жұмыс істедім, онда заманауи жабдық атаулы жеткіліксіз болды. Алғашқы жылдар мен үшін нағыз сынақ кезеңі болды: тәжірибе жинау, тез шешім қабылдау, науқастармен және олардың отбасымен жұмыс істеу қажет болды.
Ең қиын кезең – теория мен тәжірибенің айырмашылығын сезіну болды. Әсіресе науқасқа көмектесудің барлық мүмкіндігі таусылғанын ауыр қабылдадым. Бірақ уақыт өте келе мұның мамандықтың ажырамас бөлігі екенін түсіндім, тәжірибелі әріптестерден үйреніп, эмоционалды тұрақты болуды дамыттым.
Әр күрделі жағдай мен үшін сабақ болды. Қазір мен медицина – тек ғылым емес, сонымен қатар адами қарым-қатынас екенін сеніммен айта аламын.
Сізге ерекше әсер еткен жағдай?
Есте қалған жағдайдың бірі – геморрагиялық инсульт алған пациент. Ол өте ауыр жағдайда түсті: денесінің бір жағы сал болып, сөйлеу қабілеті мен кеңістікті бағдарлау қабілеті бұзылған еді.
Отбасы тез нәтижені күтті, бірақ инсульттан кейін қалпына келу ұзақ уақытты талап етеді. Біз кешенді терапия мен оңалтуды бастадық. Алғашқы қозғалыс байқала бастады, қоршаған ортаны қабылдау жақсарды. Бір айдан кейін науқас орнынан тұрып, сөйлей бастады. Оның қуанышы мен алғысы мен үшін ең үлкен марапат болды.
Бұл оқиға маған медицинада ең бастысы – берілмеу керек екенін тағы бір дәлелдеді. Кейде тіпті кішкентай қадамның өзі – үлкен жеңіс.
Сіздің мамандығыңыз соңғы жылдары қалай дамып келеді?
Неврология қарқынды дамып келеді. Қазіргі заманғы диагностикалық әдістер – МРТ мен КТ ауруды ерте кезеңде анықтауға мүмкіндік береді. Инсультті емдеуде жаңа технология – тромболизис пен механикалық тромбоэкстракция енгізіліп, өлім-жітім мен мүгедектік деңгейі айтарлықтай төмендеді.
Генетика мен дербес медицина дамып, аурулардың себебін нақты анықтауға және жеке емдеу әдістерін таңдауға көмектеседі. Жасанды интеллект медициналық бейнені талдап, аурудың дамуын болжайды және дәрігерге дұрыс шешім қабылдауға жәрдемдеседі.
Инвазивті емес әдістер, соның ішінде транскраниалды магниттік стимуляция, депрессия мен ауырсыну синдромдарын емдеуде тиімділігін дәлелдеді.
Қиындыққа қарамастан, медицина үнемі алға жылжып келеді. Бұл өзгерістер науқастың өмір сүру сапасын жақсартып, емдеу үдерісін тиімді ете түседі.
Жас мамандарға қандай кеңес берер едіңіз?
Ешқашан білім алуды тоқтатпаңыз. Медицина үздіксіз дамып жатыр, сондықтан дәрігер әрдайым заман ағымына ілесуі керек.
Пациенттерге мұқият болыңыз. Кейде дұрыс диагноз қоюдың кілті – тек терең талқылау барысында байқалатын ұсақ бөлшекте.
Эмпатияны дамытыңыз. Неврологиялық аурулар күрделі, сондықтан пациентке тек ем ғана емес, моральдық қолдау да маңызды.
Әріптестеріңізден кеңес сұраудан қорықпаңыз. Күрделі жағдайды бірлесіп талқылау ең тиімді шешім табуға көмектеседі.
Стресті басқаруды үйреніңіз. Дәрігер қиын жағдайда да сабырлы әрі сенімді болуы керек.
Жұмысыңызды одан әрі жалғастыруға не ынталандырады?
Мен үшін ең басты мотивация – науқастарға көмек көрсету және олардың өмір сүру сапасын жақсарту. Кейде кішкентай жетістіктің өзі үлкен мағынаға ие болады.
Медицина – тек емдеу ғана емес, сонымен қатар үздіксіз даму мен жаңа білім алу мүмкіндігі. Жаңа технология, ғылыми жаңалық – барлығы пациенттің жағдайын жақсартуға бағытталған.
Ең бастысы – сауығып, қалыпты өмірге қайта оралған пациенттерімнің шынайы алғысы мен көзіндегі қуанышы. Бұл – мен үшін дәрігерлік қызметтің ең үлкен марапаты.